കോഴിക്കോട് : നൂറ്റാണ്ടുകള്‍ പഴക്കമുള്ള പഴയ കോർപറേഷന്‍ ഓഫീസ് കെട്ടിടം ചരിത്രസ്മാരകമാക്കി മാറ്റാന്‍ പദ്ധതി. പുരാവസ്തു-മ്യൂസിയം വകുപ്പുമായി സഹകരിച്ചാണ് കോര്‍പറേഷന്‍ ഓഫീസ് മ്യൂസിയമാക്കി മാറ്റാന്‍ തീരുമാനിച്ചത്.
വിശദമായ ഡിപിആര്‍ ഉടന്‍ തയാറാക്കും. മന്ത്രി അഹമ്മദ് ദേവര്‍കോവിലിൻ്റെ സാന്നിദ്ധ്യത്തില്‍ മേയറുടെ ചേംബറില്‍ നടന്ന യോഗത്തിലാണ് ഇക്കാര്യം തീരുമാനിച്ചത്.
കെട്ടിടത്തിന്‍റെ കാലപ്പഴക്കവും ചരിത്രപരമായ പ്രാധാന്യവും കണക്കിലെടുത്ത് ചരിത്രമ്യൂസിയമാക്കി മാറ്റുന്നതിനു മുന്നോടിയായി ചരിത്രകാരന്മാരുടെയും സാമൂഹ്യപ്രവര്‍ത്തകരുടെയും യോഗം വിളിച്ചു ചേര്‍ക്കാനും ധാരണയായി. നഗരത്തിലെ കോംട്രസ്റ്റ് കെട്ടിടം പൈതൃക സംരക്ഷണ പദ്ധതിയില്‍ ഉള്‍പ്പെടുത്തി സംരക്ഷിക്കുന്നതിനു നടപടി സ്വീകരിക്കുന്നത് സംബന്ധിച്ചും യോഗം ചര്‍ച്ച ചെയ്തു.
മേയര്‍ ഡോ.ബീന ഫിലിപ്പിന്‍റെ അധ്യക്ഷതയില്‍ നടന്ന യോഗത്തില്‍ അഡീഷണല്‍ ചീഫ് സെക്രട്ടറി വി.വേണു , പുരാവസ്തു വകുപ്പ് ഡയറക്ടര്‍ ഇ. ദിനേശന്‍ , കേരള മ്യൂസിയം പ്രോജക്ട് എന്‍ജിനിയര്‍ എം.മോഹനന്‍, ഡെപ്യൂട്ടി മേയര്‍ സി.പി.മുസാഫര്‍ അഹമ്മദ്, ക്ഷേമകാര്യ സ്ഥിരം സമിതി ചെയര്‍മാന്‍ പി.ദിവാകരന്‍ , നഗരാസൂത്രണ സ്ഥിരം സമിതി ചെയര്‍പേഴ്സൻ കൃഷ്ണകുമാരി, നികുതി അപ്പീല്‍ സ്ഥിരം സമിതി ചെയര്‍മാന്‍ പി.കെ.നാസര്‍, കോര്‍പറേഷന്‍ സെക്രട്ടറി കെ.യു.ബിനി , എക്‌സിക്യൂട്ടീവ് എൻജിനിയര്‍ കെ.പി.രമേഷ്, മുന്‍ മേയര്‍ ടി.പി.ദാസന്‍, മുന്‍ എംഎല്‍എ എ.പ്രദീപ് കുമാര്‍,നഗരസഭാ എന്‍ജിനിയറിംഗ് വിഭാഗം ഉദ്യോഗസ്ഥര്, പുരാവസ്തു വകുപ്പ് ഉദ്യോഗസ്ഥര് എന്നിവര്‍ പങ്കെടുത്തു.